18th SUNDAY of ORDINARY TIME – C (ILOCANO)
MAIKA-18 A DOMINGO ITI PAGMAKATAWEN ( Ordinary Time)
1 August 2010
Cacabsatko ken Kristo:
Adu ti masapul ti bagi ken kararrua kabayatan iti panagbibiagtayo ditoy rabaw ti daga. Manipud naiyanaktayo ingganat mapantayo idiay nailangitan a lugar adu ti gastos para kanen, lupot, balay, panagtaming iti salun-at, ken panagadal iti uneg ken ruar ti eskuelaan. Malaksid no napagasatantayo nga nagtawid iti kinabaknang adu a tiempo ken trabaho ti paglasatantayo tapno dumur-as ti panagbiag tayo ditoy a lubong tayo. Kakabsat manmano ti bimmaknang babaen iti sugal a kas koma panagtaya iti jueteng wenno sweepstakes. No dadduma inda agsapul iti pagliwliwaan ket sumrekda iti aniaman nga ay-ayam a matiketan.
Sino kadi ti mayat iti kuarta? Awan ti ammok a dina tinal-liaw ti kuarta. Adu met ngamin ti maited ti kuarta. No awan kuartam makaadayoka kadi? Wen, adu dagiti naayat a tattao a mangilibre kenka ngem maalatayo met ti agbain no kua. Amin a problema solbaren ti kuarta ket no agproblema ti Pagilian tayo pabasolen tayo ti kinakapsut ti Economia.
Adu dagiti maal-lilaw iti sileng ti kuarta. Nagistayan maaramidmo amin a kayatmo no adu ti kuartam. Agpatakder iti aniaman a balay, eskuelaan, kalsada, pagsinean, hospital, bus lines, airports, pagsangladan iti bapor, wenno dagiti mismo nga eroplano, mapaaddada no adda kuarta. No saan a nalinteg ti tao nga addaan adu a kuarta adu met ti maaramidna a dakes. Aggatang kadagiti maiparit a droga, dagiti contrabando, ken uray pay “botos” kabayatan iti Campania para elektion. Adda pay agpasuksok tapno mabaliwan ti sentensia wenno maiyab-ababa iti panagikaro idiay pagbaludan. Adda pay ket umasideg a “hired-killer(s) tapno makabaleska iti kabusormo. Kunada pay ketdi no maituredmo ipakitada ti ulo ti pinatayda a cabusormo. Ay Apo, mannakabalin iti kuarta nga agpayso!
No lumawlawa ti nagbaetan dagiti nababaknang ken napapanglaw ti tuddoen ket ti “kuarta.” Dagiti nababaknang, nabaknangda la ngaruden, dida sardayan ti agpanunot kadagiti pamuspusan tapno manaynayonan pay ti kinabaknangda. Pasaray agbalinda a buklis iti sanikua. Manmano kadagiti nababaknang ti managparabur. Adda im-imutda kunak man laengen. Mangmangegtayo “fuera de los Buenos.” Wen, agpayso, adda met dagiti nababaknang a naayat a tumulong kadagiti napapanglaw ken kadagiti proyekto ti Simbaan. Dios ti agngina kadakuada. Inton tumulong met dagiti napapanglaw gapu iti kinaaduda, pasaray ti naurnong a kuarta dakdakkel ti bilangna ngem dagiti sag-paminsan a naawat a naggapu kadagiti nababaknang. Uray ni Apo Jesukristo bigbigenna daytoy a pasamak kadagiti agidatdaton idiay Templo. Agyamantayo kadagiti amin a naayat a tumulong kadatayo, kakabsat.
FR. DOMINADOR FERNANDEZ, SVD
DWCV – Campus Minister
DF/helen
Hits
Links
Sponsored by
